(SAKSI NGAYON NEWS TEAM)

NILINAW ng Malakanyang na bahagi ng paglilinis sa gobyerno ang pagpapasumite ng courtesy resignation ng halos lahat ng Gabinete ni Pangulong Ferdinand Marcos Jr.

Ayon kay Palace Press Officer Claire Castro, hindi ito nangangahulugan na mahina ang gobyerno dahil ang revamp ay isang paraan ng pagpapakita ng Pangulo na walang puwang sa administrasyon ang mga tamad at korap na opisyal.

Paalala pa niya, walang dapat ikapangamba ang publiko sa pagsusumite ng courtesy resignation ng halos lahat ng Gabinete ni Marcos Jr.

Habang isinusulat ito, may 28 Cabinet Secretaries na ang nagpahayag ng kanilang kahandaan na magsumite habang ang iba naman ay nagsumite na ng kanilang courtesy resignation bilang tugon sa panawagan ng Pangulo. Ang mga ito ay sina:

1. Department of Transportation (DOTr) Sec. Vince Dizon
2. Department of Social Welfare and Development (DSWD) Sec. Rex Gatchalian
3. Department of the Interior and Local Government (DILG) Sec. Jonvic Remulla
4. Metropolitan Manila Development Authority (MMDA) Chair Romando Artes
5.Department of Tourism (DoT) Sec. Cristina Frasco
6. Department of Budget and Management (DBM) Sec. Amenah Pangandaman
7. Department of Finance (DOF) Sec. Ralph Recto
8. Solicitor General Menardo Guevarra
9. Department of Migrant Workers (DMW) Sec. Hans Leo Cacdac
10. Department of Information and Communications Technology (DICT) Sec. Henry Aguda
11. Department of Justice (DOJ) Sec. Jesus Crispin Remulla
12 Presidential Communications Office (PCO) Secretary Jay Ruiz
13 Department of Agriculture (DA) Sec. Francisco Tiu Laurel Jr.
14. Department of Labor and Employment (DOLE) Sec Bienvenido Laguesma
15. Technical Education and Skills Development Authority(TESDA) Director- General Jose Benitez
16. The Department of Economy, Planning, and Development (DEPDev) Sec. Arsenio Balisacan
17. Presidential Adviser for Investment and Economic Affairs Sec. Frederick Go
18. Executive Secretary Lucas Bersamin
19. Department of Agrarian Reform(DAR) Sec. Conrado Estrella III
20. Department of Energy (DOE) Sec. Raphael Lotilla
21. Department ofEducation (DepEd) Sec. Sonny Angara
22. Department Environment and Natural Resources (DENR) Sec. Maria Antonia Yulo-Loyzaga
23. Department of Science and Technology(DOST) Sec. Renato Solidum
24. Department of National Defense (DND) Secretary Gilbert Teodoro
25. National Security Adviser Sec. Eduardo Año
26. Department of Trade and Industry (DTI) Cristina Aldeguer-Roque
27. Department of Foreign Affairs (DFA) Sec. Enrique Manalo
28. CFO Sec. Dante Ang III

Ilan sa mga ito ay nagpahayag ng kanilang kahandaan na sumunod sa utos ng Pangulo. Makikita ito sa kanilang social media post, official statement, text messages, personal na abiso ng mga kapwa opisyal sa opisina.

Gatchalian Nagbitiw Na

Isa sa mga unang tumugon sa panawagan at agad nagbitiw bilang kalihim ng Department of Social Welfare and Development (DSWD) si Rex Gatchalian.

Sinabi ni Gatchalian, bilang tapat na pagsunod sa utos ng Pangulo, lubos niyang ibinibigay ang kanyang kagandahang loob na pagbibitiw bilang kalihim ng DSWD.

“In faithful adherence to the directive of the President, may I most respectfully tender my courtesy resignation as Secretary of the Department of Social Welfare and Development” ayon sa statement ni Gatchalian.

Ayon sa Kalihim, lubos niyang pinahahalagahan ang pagtitiwala na ipinagkaloob sa kanya na magsilbi sa mga tao sa ilalim ng administrasyong ito.

Magugunitang si Gatchalian ay itinalaga ni Pangulong Marcos Jr. bilang DSWD Secretary nitong Enero 31, 2023.

Normal Na Proseso

Samantala, nirerespeto at susundin ni Justice Secretary Crispin Remulla ang panawagan ni Pangulong Marcos Jr. na maghain na ng courtesy resignation ang lahat ng cabinet secretaries.

Sa ambush interview sa DoJ ay sinabi ng kalihim na normal lang naman ang ganitong proseso para magkaroon ng free hand o malayang makapagdesisyon ang Pangulo sa mga nais nitong pagbabago.

Dagdag pa ni Remulla, nasa kalagitnaan na ang pamumuno ng Pangulo kaya marapat lang na magkaroon ng review sa hanay ng mga opisyal at may kanya-kanya naman anya ng leadership style.

Sa tanong naman kung totoo bang may isang cabinet official ang target o partikular nais palitan sa pwesto, sinabi ni Remulla na wala siyang idea o hindi niya ito alam.

Samantala, natanong din ang kalihim kung nakahanda ba siyang lumipat o humawak ng ibang posisyon sa gobyerno. Tugon niya, isa siyang sundalo ng Pangulo kaya nakahanda niyang tanggapin ang anomang role o posisyon na iaalok sa kanya.

Sa huli ay iginiit ni Remulla na karapatan ng Pangulo na pumili ng itatalagang opisyal na kanyang pinagkakatiwalaan para humawak o magpatakbo ng ahensya o departamento sa pamahalaan.

(CHRISTIAN DALE/PAOLO SANTOS/JULIET PACOT)